Гэты летні сезон запомніцца нязвыклай адсутнасцю асноўных міжнародных стартаў. Каронавірус быў бязлітасны, і пад перанос або адмену патрапілі і Алімпійскія гульні, і чэмпіянат Еўропы, і юнацкае першынство кантынента, і юніёрскі сусветны форум. Толькі ў кастрычніку наймацнейшыя бегуны збяруцца на чэмпіянаце свету на паўмарафон у польскай Гдыні, а пакуль нам застаецца чакаць пачатку нацыянальных спаборніцтваў і ўспамінаць спартыўныя падзеі прошлых гадоў. Сёння мы дабраліся да новага дзесяцігоддзя – 2010 года, які стаў медыумам алімпійскага цыклу.
Зімовы чэмпіянат свету 2010 года прыняў катарскі горад Доха, і гэты выпадак стаў другім у гісторыі, калі азіяцкая краіна стала месцам правядзення планетарнага форуму ў памяшканні. Праходзіў ён у перыяд з 14 па 16 сакавіка, у той час як умовы надвор’я ў краіне былі вельмі летнімі – тэмпература паветра ўсталявалася ў раёне 30 градусаў. Спаборніцтвы сабралі 657 спартсменаў са 150 краін свету, і гэты чэмпіянат стаў рэкордным па колькасці ўдзельнікаў. Беларуская дэлегацыя была не вельмі шматлікай і налічвала толькі дзевяць лёгкаатлетаў.
Завяршыўся сусветны форум для беларускай зборнай заваяваннем поўнага камплекта ўзнагарод, але, на жаль, праз пэўны час аўтараў медальных дасягненняў – штурхальнікаў ядра Надзею Астапчук, Наталлю Міхневіч і Андрэя Міхневіча – напаткалі допінгавыя дыскваліфікацыі і ануляванне ўсіх вынікаў, паказаных на працягу таго года. Такім чынам, гэты старт для беларускай зборнай апынуўся безмедальным.
Вышэй за ўсіх у пратаколе ў выніку размясціўся наш мнагаборац, да таго часу ўжо сярэбраны прызёр Алімпійскіх гульняў, Андрэй Краўчанка, які ў Доху, вядома, адпраўляўся з медальнымі амбіцыямі. Але склалася двухдзённая гонка для яго не зусім так, як хацелася б. У першым відзе праграмы беларус паказаў не лепшыя свае секунды – 7.22 – і размясціўся на прамежкавым сёмым радку. У скачку ў даўжыню ён паляцеў на 7.38, зафіксаваўшы трэці паказчык, і падняўся на шостае месца. Штурханне ядра сітуацыю не змяніла – у не самым паспяховым сваім відзе наш спартсмен паказаў толькі 13.59. Затое ў сектары для скачка ў вышыню традыцыйна бліскаў! Адна за адной ён пераадольваў новыя рубяжы, паспяхова пакарыўшы 2.18 з першай спробы! Гэта, вядома, дазволіла яму скараціць адставанне ад лідараў, але першы дзень спаборніцтваў для Краўчанкі так і завяршыўся на шостай пазіцыі.
Другі дзень Андрэй пачаў больш упэўнена – паказаў чацвёрты вынік на бар’ернай 60-метроўцы (8.04), а затым падзяліў першае месца з амерыканскімі сапернікамі ў скачку з шастом, узяўшы адзнаку 5.00. Перад заключным відам ён ішоў ужо на чацвёртай пазіцыі, саступаючы ў спрэчцы за бронзу 57 ачкоў. У бегу на 1500м Краўчанка адыгрываў адставанне, як мог, атрымаў перамогу ў гэтай дысцыпліне з вынікам 2:41.70, але ўсё ж прайграў трэцяму месцу па суме мнагабор’я 17 ачкоў. Чэмпіёнам свету ў памяшканні стаў прадстаўнік ЗША Браян Клэй (6204), другое месца заняў яго суайчыннік Трэй Хардзі (6184), а бронзу вырваў расіянін Аляксей Драздоў (6141). Андрэй Краўчанка набраў 6124 ачкі, у той час як у гэтым годзе ён ужо меў у сваім актыве вынік 6206 – вышэй, чым у пераможцы галоўнага старту сезона…
Астатнія ўдзельнікі беларускай каманды выступілі на дадзеным форуме наступным чынам. Скакуха ў даўжыню Вераніка Шуткова толькі 3см не дацягнула да траплення ў фінальную васьмёрку і завяршыла выступленне ў кваліфікацыі на дзявятым радку з вынікам 6.43. На дыстанцыі 1500м Наталля Карэйва дабралася ў фінал па часе, паказаным у папярэднім забегу, але там не здолела падтрымаць высокай хуткасці саперніц, у выніку фінішаваўшы дзявятай з вынікам 4:12.76. На паўфінальнай стадыі завяршыўся чэмпіянат свету для бар’ерыстаў. Максім Лынша, які ў папярэднім крузе паказаў 7.80, разбегся ў выніку да 7.71 і стаў адзінаццатым. 21-гадовая Аліна Талай першы круг спаборніцтваў прайшла з вынікам 8.15, а ў паўфінале апынулася ледзь павальней – 8.18 і пятнаццатае месца.
***
Асноўным стартам летняга сезону стаў чэмпіянат Еўропы ў гарачай іспанскай Барселоне, які прайшоў з 27 ліпеня па 1 жніўня на Алімпійскім стадыёне на гары Манжуік. У турніры прымалі ўдзел больш за 1300 лёгкаатлетаў з 50 краін, сярод іх і 42 беларуса – 15 мужчын і 27 жанчын.
Чарговы топ-турнір стаў медальным для мацнейшага беларускага мнагаборца Андрэя Краўчанкі. Адпраўляючыся ў Каталонію, беларус меў у сваім актыве 8112 ачкоў, набраныя пад заслону вясны ў аўстрыйскім Гётцысе. Адкрыў сваё выступленне на галоўным старце лета ён дзявятым паказчыкам на 100-метроўцы – 11.26, на дзясятую секунду павальней свайго лепшага выніку ў сезоне. А следам у сектары для скачка ў даўжыню паляцеў на 7.76, прычым з сустрэчным ветрам –0.9м/с! Гэты вынік стаў другім у гэтым відзе мнагаборскай праграмы і трэцім у кар’еры Андрэя. Ядро нашага атлета толькі 14см не даляцела да асабістага рэкорду, усталяванага ў тым жа годзе, і прызямлілася на адзнацы 14.32. У скачку ў вышыню яму звыкла не знайшлося роўных, і Краўчанка выйграў спаборніцтвы ў гэтай дысцыпліне з вынікам 2.10, а ў бегу на 400м хоць і даволі шмат саступіў асабістаму дасягненню, але зафіксаваў лепшыя секунды ў сезоне – 49.01. Першы дзень дзесяцібор’я наш суайчыннік завяршыў з 4309 ачкамі ў скарбонцы і трэцім прамежкавым месцам, саступаючы ўкраінцу Аляксею Касьянаву (4409) і літоўцу Дарыусу Драўдвіле (4389).
Другі дзень свайго выступлення на чэмпіянаце Еўропы Андрэй пачаў другім вынікам у бегу на 110м з бар’ерамі – 14.21, што ўсяго на адну сотую горш яго Season Best. Лідзіруючы Касьянаў не выйшаў на старт гэтага віду праграмы з-за траўмы, і пасля шостага віду дзесяцібор’я Краўчанка ішоў ужо другім. У кіданні дыска беларускі лёгкаатлет зафіксаваў 45.48, усяго 1см не дацягнуўшы да асабістага рэкорду, датаванага 2008-ым. А пасля дастойнага выступлення ў скачку з шастом – 5.05 і чарговы лепшы вынік сезона – узначаліў прамежкавы сумарны пратакол. Кіданне кап’я склалася для беларуса не так, як хацелася б – снарад прызямліўся на 2 метры бліжэй ужо наяўных у актыве ў гэтым годзе і на 6 метраў бліжэй асабістага дасягнення. Пасля дзявятага віду ён з сумай 7669 ачкоў зноў перамясціўся на другі радок услед за французам Рамэйнам Барра (7698). У бегу на 1500м Андрэй зафіксаваў лепшы вынік у сезоне – 4:36.66, але ўсё ж гэтыя секунды апынуліся недастаткова хуткімі для таго, каб зачапіцца за золата. Званне чэмпіёна з вынікам 8453 ачкі заваяваў Барра. Больш таго, на сярэбраную пазіцыю пасля гэтай дысцыпліны выйшаў галандскі мнагаборац Элка Сінтнікалас – 8436 ачкоў. Андрэй Краўчанка стаў бронзавым прызёрам з сумай 8370 ачкоў. Яшчэ адзін малады беларускі спартсмен Эдуард Міхан, дэбютант чэмпіянатаў Еўропы, завяршыў выступленне на дзявятым радку, з дакладнасцю паўтарыўшы свой асабісты рэкорд, усталяваны ў тым сезоне, – 7999 ачкоў. Ён паказаў наступныя вынікі ў дзесяці відах мнагабор’я: 100м – 10.84; скачок у даўжыню – 7.47; штурханне ядра – 13.34; скачок у вышыню – 1.92; 400м – 48.09; 110м з бар’ерамі – 14.37; кіданне дыска – 45.04; скачок з шастом – 4.65; кіданне кап’я – 53.39; 1500м – 4:34.90.
За крок ад траплення на п’едэстал гонару спыніўся на гэтым форуме беларускі кідальнік молата Валерый Святоха. З трох нашых спартсменаў, прадстаўленых у гэтым відзе праграмы, толькі яму аднаму ўдалося пераадолець кваліфікацыю і ўвайсці ў лік дванаццаці наймацнейшых у Еўропе з сёмым вынікам 74.68. Павел Крывіцкі і Юрый Шаюноў да запаветнай мяжы не дацягнулі даволі шмат і спыніліся на 16 і 20 месцах адпаведна. У фінале Валерый пасля другога выхаду ў сектар “заслупаваў” за сабой чацвёрты радок з вынікам 76.74, пасля чаго яшчэ не раз адправіў молат за 75-метровую рысу. А ў шостым выхадзе ў сектар зафіксаваў 78.20 і перамясціўся на трэці радок! Але нажаль, італьянец Нікола Віццоні, які выйшаў неўзабаве ў сектар, раззлаваўся і вярнуў сабе ўзнагароду – і адразу сярэбраную, паказаўшы 79.12! Перамогу ў гэтай дысцыпліне атрымаў спартсмен з Славакіі Лібар Харфрайтаг – 80.02, на трэцюю прыступку п’едэстала падняўся венгр Крысціян Парш – 79.06. Валерый Святоха стаў на гэтым чэмпіянаце кантынента чацвёртым.
Жаночы фінал у штурханні ядра зноў стаў ураджайным для зборнай Беларусі, але, на жаль, як мы ўжо казалі, вынікі 2010-га года Надзеі Астапчук (золата) і Наталлі Міхневіч (срэбра) падвергнуліся ануляванню. Пасля ўсіх перыпетый першае месца перайшло да расіянкі Ганны Аўдзеевай – 19.39, а другое – да яшчэ адной нашай лёгкаатлеткі Яніны Правалінскай-Карольчык – 19.29.
Маладая 21-гадовая лёгкаатлетка Анастасія Мірончык упэўнена глядзелася ў сектары для скачка ў даўжыню. Спярша яна ювелірна пераадолела кваліфікацыйны нарматыў, прызямліўшыся роўна на 1см далей – 6.66. У фінале першыя скачкі беларускі не задаліся, але ў выніку наша суайчынніца здолела заняць шостае месца з дастойным вынікам 6.75. Бронза ляжала на адзнацы 6.84 – столькі ж быў роўны і асабісты рэкорд Анастасіі, якая, у цэлым, правяла вельмі пераканаўчы спаборніцкі сезон. Шаставічка Анастасія Шведава, расіянка, якая атрымала права выступаць за зборную Беларусі, паўтарыла ў Барселоне асабістае дасягненне, узляцеўшы на 4.65 і тым самым абнавіўшы нацыянальны рэкорд. Гэтая ж адзнака пакарылася срэбнаму і бронзаваму прызёрам чэмпіянату, але немкі Сілкэ Шпігельбург і Ліза Рыжых зрабілі гэта з першага выхаду ў сектар. Шведава ж – з другой, а таму засталася ў гэтай барацьбе чацвёртай. Беларуская жаночая каманда ў “кароткай” эстафеце 4х100м стартавала ў часткова абноўленым складзе – Юлія Несцярэнка, Кацярына Шумак, Алена Данілюк-Неўмяржыцкая, Юлія Балыкіна. У фінале чэмпіянату Еўропы нашы дзяўчаты глядзеліся дастойна і апынуліся на фінішы пятымі з вынікам 43.18. Праз некаторы час у ходзе шэрагу допінгавых дыскваліфікацый вынік зборнай Расіі, якая размясцілася вышэй у выніковым пратаколе, быў ануляваны, і сягоння пазіцыя беларусак значыцца як чацвёртая.
